Jonah L Pachuau
Vanduai thlak takin nungcha humhalhna kawngah hian kan harhchhuak har hle a. A nachang kan han hriat ve meuh chuan a tlai ta mah mah emaw tih mai turin kan dinhmun hi a chhe tawh hle a ni. Kan hnam chanchin chhui duah ngai lovin, sapel hnam kan ni thin ti ila a sual thui awm love. Amaherawhchu, Kristian kan lo nih hnu leh ziak leh chhiar kan lo thiam hnu (modern age) ah hian zirtirna thar chi hrang hrang kan dawng a. Kan hun thar tawn mekte hian nasa takin kan ram leh hnam hi min rawn nek her mawp mawp chu a ni ber a, kan hnam ze mawi (identity) rawn pawlh dal tial tialin hlauh thak thei dinhmunah kan lo ding ta der mai.
Hmanni lawk khan chanchinbuahte kanlo chhiar a, kan ram dan kalh zawnga thingtlang lama kan unauten sa an pel avanga man an nih thute khan rilru a ti kal thui duh hle mai. Kan unaute zingah kan hnamze hlui la thlah phal meuhlote an la awm niawm tak a ni a, a vanduai thlak hle niin a hriat. A vanduai thlak kan han tih tak maite pawh hi, ngaihtuah chian chuan a zahthlak hle a, mahni hnam ze hlut nachang hrelovah pawh a inngaih theih hial awm e. Kan hnam a lo changkanna kawngah hian ‘Sapel hnam’ nihte hi tunlaiah chuan thil zahthlak niawm takin kan inzirtir mek a, hetiang hian hmasawnna chuan kan hnam ze hrang hrang chu minrawn thlauhthlak tir nghauh nghauh mai dawn niin a lang. Sapelh hian kan ram dan a kalh mai bakah, a nunrawn thlak, tuma pawi sawilova ramhnuaia tla mai mai thin ramsate an khawngaih thlak tiin kan inzirtir mek lai a ni a. A changkan thlak hle niin a lang. Hetianga ram dan kalha sa lo pel tawk tawkte hi kan zinga harhfim thar zualte chuan ngaihdan khauh tak neiin ‘Danin a phut anga a na thei ang bera hrem’ tlaka ngaite pawh an lo awm ve tawh ngei ang.
Engemaw chang hi chuan, kan pi leh pute hian ze tha leh mawi, belhchian leh chhawmdawl tlak an lo nei tak tak ngang lo emawni chu aw? Tiin ngaihtuah na a kal thui thei hle a. Nghet taka YMA in, ‘tlawmngaihna’-a innghat tlawng mai theite hi a itsikawm takmeuh a. Hei lo hi hnam ze hlui chhawm nun leh humhalh tlak sawi theih kan nei em? Lu la hnamte pawh minlo ti thin emawni..(a pa rem rem khawp mai) Amaherawhchu, kan sakhaw thar zirtirna nen a inmil tawh mawlh si lo. Hei lo hi thildang hnamze humhim leh chhawmdawl tlak kan nei em? A ruh no no chhuakah tiin sem sem dam dam, tihte kha engmah lovah kan chantir mek zel chu a ni a.
Kan society kalphung hi han zir chiang leh lawk ila, kan veng/khua chhunga kohhran leh tlawmngai pawl hawi zawnga kan mi ngaisan zawng, kan mi chawimawi, an thu leh hla kan ngaihthlak, hruaitu atana kan thlan chhuah leh kan zah ngawih ngawihte hi eng ang mite nge an nih? Mi inngaitlawm, taima leh thawkrimte nge mi chapo, hlemhle leh sum leh pai lakluhna kawnga pawisak nei miahlote? Mi chapo leh hlemhlete an nih chuan kan society chuan kan fate rilruah hetiang mi nih tum chakna kan lo tuh der mai a lo ni a. Kan hnam zia ni ngai hauh lo ze thalo leh kan hnam tana tangkai lem lo ze chi hrang hrang kan inzirtir tam ta mawlh mawlh hle mai.
Ram inrelbawlna leh inkaihhruaina kawngah hian ram leh hnam an changkan poh leh dan leh hrai lama in kaihhruaina an nei chikimin an nei chipchiar thin tih hi kan hre fo tawh thin a. Hei hi thudik a nih hmel viau. India ram erawh chu dan leh hrai nei chikim leh chipchiar ber pawl ni mahse, a changkang ber lem lo. India ram constitution hi khawvela khawi ram constitution mah hian chipchiar leh kimchan kawngah a tlukpui an awm lo a tih theih a. Amaherawhchu, India ram hi a mipuite enkawlna kawngah leh an chanaite pekna kawngah a sang lem lo. Hei hi engnge a chhan kan tih chuan, zirmite chuan hetiang hian an sawi fo thin. India ram dintute chuan hmathlir tha leh ril tak neiin khawvela constitution tha ber berte rawnin, a tha tha an fawm khawm. Mahse, he constitution tha leh changkang tak ruahman tur hian Independent India chuan British sorkar awpbehna hmanrua pawimawh tak British India Civil Service te chu thiat chuang lovin, IAS (Indian Administrative Service) tiin an hming chauh thlakin an chhawr chho ta zel a, British sawrkar awpbehna hnuaia an officer train chhuahte chuan Independent india mipuite chu India sawrkar hnuaia mipui rawngbawltu ni lovin, mipui chunga leng mipui awpbehna rilru hmang chung zel chuan rorelna kut chu an thlak chho zui zel ta a ni a, hetiang ‘zia’ hi tunhnu thleng hian kan IAS officer ropui tak takahte pawh hian a la hmuhtheih a ni.
Heitiang ‘inawpbehna zia’ hi kan ram inrelbawlnaah pawh hian a lo inzep nghet hle niin a lang. Kan politicianste te hian anmahni thlang chhuaktu mipuite duhdan ngaihchan nachang hre hauh lo hian, mipuite chunga leng, an duh ang anga an chunga ro rel thei niturah hian an inngai ta mauh mai thin a, hetiang hawi zawng hian an khawnbawl (Administrative Service) te hian an lo fuihpawrh thiam hle bawk nitur a ni. Mipuite lah pawh hian kan politicianste leh an khawnbawlte hian hmanlai Lalte anga kan chunga an duh ang anga rorel thei turah hian kan ngai hmin bal mai bawk si a, an tih theih loh thleng thleng pawh titur hian mipuite hian kan nawr zawk emawni chu aw? Tih theih chang hi sawitur a tam ve hle awm e.
Heta tang hian kan ram inrelbawlna kalphung pawh hi han chhui chiang deuh ila, kan inrelbawl dante leh kan hotute thu ken duhdante atang hian mipui rawngbawltu nihna atanga rorel aiin mipui awp bettu nihna atanga rorelna hi a lo irchhuak nasa zawk hle thin a ni. Kan tawngkam leh thu kau chheh atang ringawt pawh hian kan ram hruaitute leh mipuite rilru a lang chiang hle awm e. Entirnan, kan ram sorkar inrelbawlna kawnga nihna nei sang te chu “Thuneitute” kan ti thin a. He thumalin a ken tel chu thuneitute chuan “thu” chu an ken miau avangin an duh zawng ang angin an chelek thei ni awm tak a ni a. An chet hmangah pawh hetiang lam hawi zawng hian tamtak chu an che bawk thin. Kan magistrate-te leh officer nihna nei sang deuhte chuan “thuneitute” ni tak tak emaw an intih avang chuan dan ‘chunga leng’ an ni emaw an inti tawh a. Thu chu an remchanna ang anga chelekin an kai kual vel ta mai mai thin a ni. Hetianga dan vawngtute berin an dante an remchan ang anga an palzut a, an chelek thin avangte pawh hi a ni mahna, mipuite pawh hian sorkar dan (hnawksak deuhva kan ngaih) tamtakte hi kan zah lem lova, zawm kim aiin palzut theih dan kan zawng ve mai thin niin a lang.
Hei hi tunlai modern democracy kalphung kalh tlat a ni a. Modern democracy ah hi chuan mipuite hi thuneitute an ni a. Sokar hnathawktute hi mipuite thu hlentu leh kengtute an ni mai a ni. (Democracy of the people for the people and by the people) Hetianga awpbeh (mipui) leh awpbettu (sorkar thuneitute) nihna rilru kan put chhung hi chuan kan ram hian hma a sawn hauh lovang a tih ngam a ni. Hetianga inawp behna atanga dan lo chhuak thin reng rengte chu “mipuite tan” a nih aiin “hotute remchanna” atan a ni zawk fo thin a, mipui harhfimte chuan an helhin an zah ngai chuang lo a ni.
Entirna atan a remchang tho bawk a, a tira lama kan han sawilan, kan unaute zinga kan hnam ze hlui kalsan hreh tak takte, kan ram danin a phal tak loh avanga maia ‘misuala’ kan chhiarte kha han sawikai leh lawk ila. THE INDIAN WILDLIFE (PROTECTION) ACT, 1972 leh a hnu lama amendment hrang hrangte chuan zoram mipuite chu rawn awp betin, kan hnam ze kalphung kalh thakin dan râwng leh khauh tak mai hmang chuan vawi leh khatah, kan mi ngaihsan zawng, kan hnamze mawi leh tha anga kan ngaih leh kan pasaltha zawng zawngte chu dan pawnah min rawn hnawlsak tak hlauh mai a. He dan hian chhut nachang kan hriat phak bakin kan social life ah te, hnam anga kan inkhaihhruaina kawngah te, kan thil hlutzawng (value system) inzirtirna kawngahte leh kan nitin inrelbawl danahte thleng hian nghawng nasa takin a rawn nei a ni. He dan hian kan hnam zia a rawn kalh a ni tih piah lamah hian, a keng kawhtute atana a rawn ruahman, Mizoram Forest and Environment Department ina a chelek danah hian mipuite hian “thu inkalh” tam tak kan hmu a, kan rawn tarlan hmasak, ram dan chunga thuneitute an ni emaw an intih avanga an duh ang anga mipuite chunga leng chunga rorel tum thinte chuan an remchanna apiangah an dante chu an chelekin an palzut ta bawk si a. “Mizoram Forest department enkawlna hnuaia ram zawng zawng te chu tunhnu thleng pawh hian an enkawl phak loh ramte aiin a chereuh chak zawk zel a ni” tih hi chu tlang hriat a ni. Mizote chuan hei hi ‘Ziak loh Dan’ (unwritten law) anga thudik tlukah kan ngai hmak tawh a ni. Nungcha humhalh sawi laia ram chereuh mai mai han tarlan hi ‘inmil’ lo deuhvah kan ngai a ni mai thei. Amaherawhchu, ramhnuai tel lo hian nungchate hi an awm thei lova, an tlan tur thing leh mau tamna lamah an pem lo theilo a ni. Hei hi kan rama nungchate an lo chereuh nachhan lian ber zawk chu a ni. Chutiang bawkin kan ramhnuaite hi kan humhalh duh a nih chuan, ramhnuai leh nungchate hi inchawmtawn leh inmamawh tawn an nih vek avangin nungchate pawh hi kan humhalh tel a ngai thin a ni zawk. Hetiang bawk hian mihringte kan damzel (survive) na tur chuan ramhnuaite hi an pawimawh em em a, ramhnuaite hian sik leh sa an nghawng thin avangte leh ramhnuai atanga chakkhai kan tharchhuah tam takte hi, mihringte mamawh em em an lo nih zel zawk avang hian nungcha kan humhalh nachhan pawimawh ber chu mihringte bawk hi kan lo ni zawk.
Thuneitu kan ni tak tak emaw kan tih avanga mipuite pawisa hauh lova dan siam leh chelek kan tum chhung hi chuan kan ram hruaitute chuan ram kaihhruai an tumna kawngah hlawhchhamna leh beidawnna bak hmuhtur an nei dawn lova, a lang a pauva mipui hmuh theiha thu khauh leh khawng tak tak hmanga inhrosak vak vak hian engmah a hlen chhuak lo. Hmai phihna mai a nihzia a chiang. Heng bakah hian mipuite lam atangin hotute sitna, huatna leh an rorelna laka helnate chu a thlen mek zel zawk a ni.
1970 lai vela India ramin nungcha humhalh pawimawhna a hriat tan tirh lai khan khaw thlang lamah USA pawh hi a lo harhchhuak ve hlauh mai a. India ram leh USA chuan a rual deuhthawin nungcha leh ramhnuai humhalhna kawngah dan leh thupek a duang tan a ni. Amaherawhchu, India rama ‘Thuneitu’ niawma inhriate chuan khawvel tana ‘entawntlak’ niawm taka lang, dan khirh leh khauh tak mai an duan lai chuan USA chuan kan rawn tarlan tak zul zui hian ramhnuai leh nungchate humhalh a pawimawh nachhante chu mipuite hrilh hriain, an mipuite ‘ze mil’ zawng takin zirna leh inzirtirna thuk leh ril tak nei chung chuan ‘nungcha humhalhna’ dan thar chu a lo duang veta a. USA chuan an thil humhalh chhante chu mipuite bawk hi an ni tih hriain sa pelh ‘khapbur’ aiin inzirtirna lamah tan an la a. Sa pelh theih chi, a hun leh a zatte chu scientific taka chhutin, a ram dante kengkawhtu atan chuan a mipuite chu punin a ruai zawk a, sapel duhte chuan sorkarah chhiah pein, sorkar mithiamte ruahman ang thlapin thu awih takin sorkar dante chu an zawm fel then mai a ni. An chhiah pek hmangtu an forest department kalhmang finfiah leh vengtu pawimawh tak an lo ni zawk der mai a ni. Hetianga ramhnuai leh nungchate humhalhna dan duan a nih hnu kum sawmli zet a liam hnu hian, khawvela ramhnuai leh nungcha humhalhna kawnga dan khirh leh khauh ber duangtu India chu khawvela nungcha humhalhna kawnga hma la te zingah a hlawhchham filawr lak a, a rawngbawl sak mipuite kuta innghat ngam USA sorkar erawhchu khawvela ramhnuai leh nungcha humhalh tha ber a lo nita a ni.
A nihleh sap ho ang hian engatinnge thu kan awih ve mai loh? Mizote hi hnam thuawih leh kaihhruai nuam tak kan ni, kan inti thin a, a dik tlangpui. Kan tana tha zawktura chiang taka kan hriatte hi chu zilh leh hau ngai lovin kan zawm mai thin. Aizawl traffic te hi han thlir ila, phai lam atanga lo kalte chuan ‘foreign’ ram emaw an ti thlawt! Traffic rules kan zah dante, lane driving kan zawm that dante, leh horn pek tuarh tuarh kan chin veloh dante an han hmuh hian hnam ang chuan India rama traffic sense nei sangber minti fo a ni.
Amaherawhchu, mizote hi kan â bik lova, kan awmhmun theuhah kan awm chut chut emaw tih lai hian, kan lo meng ve kiau mai si a. Forest department in kan rama nungcha chereuh chhanah sapel hratte an mawhpuh mek lai hian, mipuite chuan ramngaw an tih chereuh chak zia leh an officer te pawh sapel hrat hrat an nih zia leh silai nei tha ber berte an nih zia an hre kiau mai a. Mahni thupek pawh zah duhlo leh zawm zolote chu tuiin nge zui duh reng ang?
Kan hnam zia bawkah chuan lo lut lehta ila, hetianga ui chung reng si a, kan hnam ze mawi leh danglam tak takte kan thlirliam mek lai hian, mak tak mai chu khawvela democracy lian ber chuan, a mipui hnam leh sakhaw chi hrang hrang be mite rahbeh leh chimral an lo nih mai loh nan, keini Mizote tan pawh ruahmanna min lo siam sak dim diam mai a, chim ral kan hlauhnate leh kan hnam zia kan hlut em em te kan humhalh zel theih nan, India ram chuan kan ram mipuite chu “Mizoram Peace Accord 1986” minlo pe phal der mai. He peace accord hian a thuphungah, kan hnam hlauhthawnna zawng zawngte a huam tel a, he accord hmang hian zoram mipuite chuan India ram inrelbawlna dan zawng zawngte chu kan hnam ze kalh leh mil lo zawng an nih chuan, min huamtir ve lo emaw, India ram danpuite chu kan hnam ze mil zawnga kaih lek phalna emaw chu min lo phalsak a ni der mai! Amaherawhchu, kan haw haw dur dur hmain, Peace Accord 1986 kan lo neih tak atanga kum 20 chuang zet a liam hnu hian kan hruatute hian he accord hi an hlamchhiah hulhual emaw tih mai turin, vawi khat mah anla chelek ngam lova, ziakloh ang mai a lo ni der tawh zawk a ni.
Mizoram Peace Accord hmang hian huaisen leh zahawm takin kan hnam ze danglam (unique) leh hlu takte humhalh leh chhawmdawl chungin khawvel hnam ropui, zahawm leh chhuanawm dangte rualin ke kan pen dawn emaw tih laiin, helam hawi zawng hian kan ram hruaitute leh ‘thunei’ inti tute hian vawikhat mah ke an la pen lo a tih theih a ni. Helam hawi zawnga pen chu sawiloh, Mizo mipuite aiawha Mizoram Peace Accord signtu political party ve ve te hian kum 10 zet zawt chu ram an hruai tawh a, India ram danpui hmanga Mizo mipuite rahbehna kawng chi hrang hrang phawrh chhuah bak chu Mizoram Assembly ah hian vawi khat mah hma lak a la awm lo.
Han belhchian lehzual phei chuan kan ram hruaitute hian mizo mipuite hi india ram danpui meuhpawh bawhchhiain kawng hrang hrangin kan zalenna leh kan chanai laksakin mipuite hi min lo rapbet thin zawk a lo ni der a ni. Sorkar laipuiin zoram mipuite mahni hnam ze mil zawnga inrelbawl min phalsak reng chung si hian, kan ram hruaitute chuan central sorkar lamah kan hnam min phatsan mawlh mawlh reng a, a entirna ho leh chiang tak chu, India ramah khawi state sorkar mah hian ‘Ashoka Pillar’ hi state emblem ah an hmang ngai lova, phal pawh a ni hek lo! Kan ram hruaitute erawh chuan khulam laka intih tlaktlum tum niawm takin, awm leh awm lo pawh dawn lovin, an han hmang tei vet a. Nge ni a, kan officerte hian an sorkar hi nep an tih lutuk a luatah, tlema inchawisan an tumna pawh a ni mahna.
Hei lovah pawh hian, entirna dang han siam leh ta ila, Mizote hian silaite hi kan lawmin kan ngaisang em em a, pasalthate tan chuan silai hi hmanraw tangkai leh hlu tak a ni. Chutiang a nih bawk avang te leh, silaite chu sal nilo, hnam zalente chhinchhiahna, englai pawha mimalin a sahimna a humhalh theihna atana hmanraw pawimawh leh tangkai a nih avangin, India ram constitution ngei pawh hian Article 21 hmangin a mipuite chu dan angin silai kawl leh neih a phalsak a ni. Hetiang hian kan sorkar laipui dan chuan Indian Arms Act 1959 hmang chuan mimalin silai a kawl leh neih theih dan chungchangah India ram mipuite tan ruahmanna a siam a. Mimal silai kawl leh neih duhten sorkar phalna ang ngeia an neih theih natur hian, he Act hian chutiang kawngah chuan state tinte chhungah thuneihna sang ber neiturin District Commissioner/Magistrate a ruahman a. District Magistrate chu Indian Arms Act dan chuan diktak leh rualkhai taka vawn leh ruahmantu tur atana thuneihna sang ber a pek chu a ni. Amaherawhchu, he dan hi British sorkar ruahman, tlema kaihlek mai a nih avangin duhthu a sam lovin a famkim lo hle a, he act hian mimalte chu silai kawl phalna kawngah zalenna engemaw chen a pek laiin, khuahkhirhna tangkai lem lo tamtak a la siam sak tho a ni. He act hmanga dan kenkawh leh chelek a nih thin kawngah phei hi chuan mimal zalenna aiin khuahkhirhna a tam zawk hle a ni.
A chhan chiang taka han belhchian chuan, he dan hi India mipuite siam a ni lova, British sorkarin a salte thununna atana a ruahman a lo ni der a ni. British rorelna hnuaia India ram sorkar khan a salte an hel kha a hlau em em mai a, Jallianwalla Bagh hnuah phei kha chuan Viceroy Lord Lytton (1874-1880) khan India ram chunga ro an relna kawngah dan chu nasa takin a sik sawi danglam a ni. Viceroy Lord Lytton hian India ram mipuiten silai an kawl leh an siam theihna kawngah Indian Arms Act, 1878 (11 of 1878) hmang hian khuahkhirhna nasatak a siamsak a, India ram mipuite chu an ralthuam chhuhsakin an lo awm ta a ni. He dan hian India ram chhunga cheng ve tho mingote chu a huam tel lo a ni.
India ram zalenna sualtu leh India ram dintute chuan he dan hi dovin an helh hle a, India ramin zalenna a lo sual chhuah hnu phei kha chuan India ram dintute chuan India ram constitution ah a mipuite chuan an chanvo diktak an neihtheih naturin leh anmahni himna an venhim theih naturin “Right to keep and bear arms” hi a lo telh ta nghe nghe a ni.
Mahatma Gandhi thu kamchhuak tawite han tarlang ta lawk ila, “History chuan British sorkarin India ram mipuite chunga rorelna diklo tamtak a hlenchhuahte zingah, Indian Arms Act 1878 hmanga India mipui ralthuamte a chhuhsak hi a rorelna thim berah ala dah dawn a ni” a lo ti nghe nghe a ni. (An Autobiography OR The story of my experiments with truth, by M.K. Gandhi, p.238)
Independence hnuah hian India ram hruaitute chuan ram chunga rorelna kawngah, a hmanraw pawimawh ber atan British sorkar atanga an rochun civil servants te hi an lo ruai leh ta mauh mai si a. Heng civil servants te hian an ze hlui thlah thei lovin, Pu thar nei maia inngaiin, India ram chunga ro an rel dan pangngaiin ro an rel chhunzawm ta tlat mai. British sorkarin min awpbehna dan Indian Arms Act chu independence hnu kum 12 lai ral hnuah thlauhthlak a lo ni thei hram a, amaherawhchu, a thar duang tura India sorkarin ‘mithiam’ a punte chu, Bristish sorkarin India ram mipuite a rahbehna kawnga hmanrua tangkai tak, mahni mipuite phatsan a, an rin hlawh lo, leh mipuite ringngam lo, India civil servants te chu an lo ni mauh mai! Heng mite hian hetiang inrinhlelh tawnna boruak hnuaiah hian Indian Arms Act 1959 thar chu an lo ruahman ta a ni. He dan hian kawng tinrengah a paihthlak tum dan hlui chu a zawm a, ruahman (implement) a nih dan kawngah phei chuan mipuite tan kawng tamtakah khuahkhirhna leh harsatna nasa zawk a siam a ni. He dan ruahman a nihna kawngah hian India ram mipuite chuan harsatna tam tak an tawk a, mi pangngai tan chuan dan phalna hnuaia silai neih leh kawlte chu thil theihlohah a lo chang zo ta a ni.
Mizoram anga ram kilkawr, sorkar rorelna (administration) that vak lem lohnaahte phei hi chuan, Indian Arms Act 1959 hian mipuite chanvo pek a tum chu a thelh hulhual a, sorkar ‘thuneitu’ inti te leh ram hruaitute chuan an remchan dan a zirin he dan hi an chelek a, anni leh keini ti zawnga mipui thenhranna hmanrua, duhsak zawngte duhsakna hmanrua, inhrosakna hmanrua leh diklo taka mipuite chunga rorelna hmanruaah an lo chantir ve thei tawk a ni. Mizoram sorkar hian state kan lo nihve tak hnuah hian, India ram danpui alo tawngpawng zawm ve zul zulte zingah, Indian Arms Act 1959 hi a ti chingpen hneh ber awm e. Hei hi hnam danglam tak kan nihna anga inthurualna atanga lo irhchhuak, kan hnam tana a remchan tawk loh hriatna atanga rualkhai leh huaisen taka kan inruahman chu nise a la pawi thui vak lo thei a. South India a ‘Coorgh tribals’te tan chuan tun thleng hian silai kawlna kawngah sorkar phalna ‘licence’ an mamawh lova, silai hi an hnam zia nen a bik taka inkungkaihna neia an inchhal vang a ni. Amaherawhchu, han chhui chian chuan kan ram politicianste leh civil servants ten, tenawm leh diklo taka mipuite zalenna leh chanai chhuhsaka, anmahni hamthatna hmanrua atana an chelek duh vang mai zawk a lo ni. Han chhui thui lehzual chuan Assam state sorkar hnuaia kan awm lai leh Union Territory kan nih laia hnamdangte rorelna hnuaia kan awmlai khan Zoram mipuite hian kan chanai (rights) diktak chu kan lo chang tam zawk daih a ni. Tun dinhmuna kan ram roreltuten Indian Arms Act 1959 an pawngsual danah hi chuan ram mipuite tan thu awih ngaihna a awm lova, dan chu a zawm duhtute tan pawha awmze nei lo leh zawm ngaihna awm lovah kan chantir tawh a ni. He danin a phut anga thuneitu tur atana a ruatte chu he dan vek bawhchhiain, kan politicianste chuan an thuneihna chu huamhauh takin an chhuhsak a, mipuite tan nilovin mahni hmasial taka an mi duhsak zawngte tihlungawi leh vulhlen nan an hmang a ni. Chutiang bawk chuan an mi duhsak zawngte pawh hian dan palzutna remchangah lain, mipui chunga leng a, dan phalloh mi ‘thil tithei’ dinhmuna dingah an inngai a, danin mipangngaite neih a phalloh thleng thlengin silaite chu an kawl rem rum mai a ni. Hetianga roreltute ngeiin mipui mit hmuha dan an palzut thinna atangte hian mipuite thinlungah dan hmuhsitna leh hlamchhiah duhna a lo piang tan a, tih dik a nih vat loh chuan, kan ram kalphungah chuan, a mawhphurtute aiin, mipuite bawkin an tuar anga, a nghawng thalo thui tak chu kan ram hian a la tuar dawn chauh a ni.
Kan hnamzia kan humhalh dawn chuan nungchate kan humhalh tawh dawn lo tihna emni?
Hnai love, kan hnam leh kan sakhua mil zawngin kan humhalh mai zawk tur a ni. Kan ramhnuai leh nungchate humhalhna kawngah hian mizote hian hnamdang sakhua zirtirna kan mamawh lova, kan thurin kan Bible zirtirna hi kan tan a tawkin a tha em em a ni. Thuthlung hlui kan thlir chuan, Pathian chuan a huan enkawltu atan mihringte chu a lo siam a, hei hian mihringte kutah mawhphurhna sangtak min lo pe a lo ni. Huan enkawltute chuan huan hausakna an tlan chu a phal khawp a, amaherawhchu, duhamna atanga lo chhuak hlemhletna nei chunga kan duh ang anga kan tih chingpen chu a phal hauh lo. India ram sorkar chuan a mipui tamzawk Hindu leh Buddhist sakhua mil zawngin nungcha humhalhna kawngah hma a la a, a awm e! An sakhua chuan nungchate chu mihring tluk thaw thangin a ngai a, nungchate mahni mihringpui ang thova zah leh hmangaih a zirtir a ni. Hemi avang hian India ram mipuite chuan nungchate chungah chuan ngil I nei tawh teh ang u, nungchate hi i hmangaih tawh ang u, tiin an sakhaw hawi zawngin an inzirtir a, an hlawhtlin tak lem lohte chu lo dahtha phawt ila, an mipuite sakhua mil zawnga kal pawh chu an tan chuan a dikin a tha a ni mahna! Hunin a hril tawh a, khawvel in an hlawhchham zia a hria a, an harhchhuak duh chuang lo! India Brahmin te chuan nungcha humhalhna kawngah khawvela ‘moral ground’ nei dik leh sang berah an inngai tlat! Chutih lai chuan India ram chhuan tawlawl khawvela sakei tamna ber zinga ngaih Sariska Tiger Reserve pawh chuan sakei te awm nachang hriat loh Dampa Tiger Reserve a tluk tep tawh a ni!
Mahni tawka ngaihtuahna nei ngam lova Hindu leh Buddhist zirtirna zul zuia nungcha humhalhna kawnga hma kan lave ta ngawt maite hi kan hnam tan chuan inzirtirna diklo a lo ni der mai zawk a, hetiang zirtirna hian kan sakhaw thurin pawh a hruai sual thei awm e, a hlawhtlin tak tak pawh a hlauhawm letling zawk a ni. A lehlamah, hetiang kalphunga nungcha humhalhna hi chuan hlawhchhamna bak a thlen lo tih chu India ram khawmualpuiah a lang tawh reng bawk si. Kan ram leh a mipuite kan inkaihhruaina kawngah hian kan harhchhuah a hun ta hle mai. Mipuite hi kan hruaitute nawr kal theitu awmchhun kan ni a, pai khut khut chunga kan innawr kal hram hram loh chuan keini bak hi tuartu tur an awm lo. Kawng dik zawnga kan innawr kal loh chuan kan ram ti chereuh leh hrehawm tu chu keini tho hi kan ni dawn a, nungchate hi chuan ram nuam zawkah min pen san dial mai dawn a ni.
Mipuite chunga rorel dan awmchhun chu an rawng bawlna hi a ni. (You can only govern men by serving them – Victor Cousin)
“Sairawkherh khap a nih hnuah chuan, misualte chauhvin sairawkherh an nei ang.”
(Cum catapultae proscriptae erunt tum soli proscript catapultas habebunt – Grik thufing)
Eng dan mah hian eng sual mah hi a la dang lo.
(No law ever prevented a crime)
“Nungcha thenkhatte hi sapelh atana an remchan a, nungcha thenkhatte hian sapelh an thiam bawk si chuan, Pathian hian sapelh hi a lawm ni ngei tur a ni.”
(If some animals are good at hunting and others are suitable for hunting, then the gods must clearly smile on hunting. – Aristotle)
Mipuite ralthuam kawl khaptu dan chuan, dan bawhchhe duh lo leh tumlote bak a khap hlawhtling ngai chuang lova, hetiang dan hian misualte tan remchang siam mai bak chu tangkaina a nei lo. Tharum hmanga kutthlak chingte tan a tuartute dinhmun a ti derthawng sauh zawk thin a ni. Tualthattu te dang lovin, an hna a ti awlsam zual sauh a, achhan chu ralthuam neivelote chungah a nei bikte chuan zalen takin kut an thlak thei a ni.
(The law that forbids the carrying of arms… disarm only those who are neither inclined nor determined to commit crimes. Such laws make things worse for the assaulted and better for the assailants. They serve rather to encourage than to prevent homicides, for an unarmed man maybe attacked with greater confidence than an armed man. Thomas Jefferson)
A ngaihna hrelova mahni chunga inthlentu mipuite chungah hian diklo taka rorel chu a nuam ber a. Sal tha ber berte chu sal anni tih inhrechhuak hauh lova bawiha insiam chawp duhte hi an ni.”
The ideal tyranny is that which is ignorantly self-administered by its victims. The most perfect slaves are, therefore those which blissfully and unawaredly enslave themselves
Dresden James.
Jonah L Pachuau in phal taka a article ka blog-a chhuah min phalsak avangin ka lawm e
Tags
Article