India naupang te dinhmun zirchianna committee ka chhim

With Grace Gangte, India Embassy Geneva

Vanneih thlak takin June ni 2-3, 2014-a United Nations hnuaia naupangte dinhmun zirchianna committee (66th Session of Committee on the Rights of the Child) Geneva, Switzerland-a neihah khan chinchang ngaithlatu (observer) atan sawm ka nih angin ka tel ve hlauh mai a, ka kalna senso hi UN High Commissioner for Human Rights lamin min tum saka, ka thlenna tur Geneva Welcome Centre-in min buaipui bawk a.

He committee-ah hian India ram in Convention on the Rights of the Child (CRC) a pawmpui ve avangin report a pek hun a lo ni leh ta a, UN Convention of the Rights of the Child (CRC) chhunga Report Pathumna leh Palina inkawp (Third and Fourth Combined Periodic Report) bakah hian Optional Protocol on Sale of Children, Child Prostitution and Child Pornography (OPSC) leh Protocol on Involvement of Children in Armed Conflict (OPAC) chungchanga an report te zirchianna hun a ni a. India team-hi Shankar Aggarwal, Secretary, Ministry of Women and Child Development in a rawn ho a, mi 10 dawn lai rawn thawkchhuakin Ministry of Home Affairs, Ministry of Health & Family Welfare atang te pawhin palai an rawn hruai bawk a.

Geneva -a India Permanent Representative to UN office atang hian kan zohnahthlakpui Nula Grace Gangte, India in International Treaty Body Convention-a pawmpui te  (eg CRC, UPR) lam changtu a rawn tel ve nawlh bawk a, ka zohnahthlak pui chu hmuh ve ngei ka duh a ni tiin committee tawp ni hian kan in hmu nawlh a, rinloh taka ka zohnahthlakpui han hmuh chu lawmawm ve tak a ni.

India ram-ah hian naupang vaibelchhe 472 vel an awmin an chhut a, chu chu khawvela naupang awm zawng zawng atanga chhutin za a sawmhnih (20%) zet a ni, chumi avang chuan buaina leh harsatna te hmachhawp sorkar pawhin a ngah em em a. Sorkarin naupang te tana a hmalakna langsar zual a tarlan te chu - National Commission for Protection of Child Rights (2007) bakah State Commission for Protection of Child Rights state tin deuhthaw a din tawh te (vanduai thlak takin Mizoram-ah din ala nilo). National Policy for Children (2013) te, National Food Security Act,  2013(naupang tan provision hran a awm) te, Integrated Child Development Scheme (2012), te, Rashtriya Kishore Swasthya Karyakram (RKSK), SABLA, Protection of Children from Sexual Offences Act - 2012 te, Juvenile Justice Care and Protection Act - 2000, Integrated Child Protection Scheme (ICPS)  2009, National Early Childhood Care and Education (ECCE) Policy (2013) te tarlan a ni bawk.

Indiachhung district 619-ah Child Welfare Committee (CWC) din a ni tawh a, Juvenile Justice Boards (JJ Board) pawh District 608 ah din a ni tawh bawk a, Integrated Anti Human Trafficking Units (AHTU) district 225-ah din a ni tawh bawk thu te tarlan a ni bawk.

A tlangpui thuin India sorkar hmalakna hi a tha thawkhat viau a, amaherawh chu naupiang hlim thi (infant mortality) tam lutuk, naupang kum 5 tlin hmaa thi leh nau avanga nu thihna lamah erawh chuan a hma lakna a duhthu a sam loh thu an sawi uar hle a, Kum sawm kalta vel atanga Mizorama naupiang thi zat tam chho zel chungchang pawh sawilan a ni bawk, zirna lam leh dan siam lamah chuan hma la tha viau mahse naupang hriselna leh himna chungchangah chuan report zirchiangtu committee member duhthu a sam lemlo hle tih a hriat a, tunhnaia Uttar Pradesh-a naupang pawngsual inawkhlum ta chungchang chuan sawi zui a hlawh hle bawk.

India ram state tin deuhthaw in State Commission for Protection of Child Rights an neih laia a neilo tlemte zingah Mizoram kan tel hi thil mak tak pakhat a ni awm e !! An thuneihna a sang a, an hmalakna a tha hle a ni, kum 2010 khan zohnahthlak naupang pakhat Karanataka Hospital pakhata  a boral chungchangah medical negligence a ni tiin National Commission for Protection of Child Rights-ah zualkona ka thlen a, Karnataka State Commision chu case chu hlan chhawngin an ni hian a tawp thlengin min buaipui a, thuneihna sang tak nei hetiang commission hi kan state hian neih tul kan la ti lemlo nge tih ka rilruah a rawn awm thar leh hle mai.

Committe hian report final a la siamlo a, hun reiloteah a rawn siam zo thuai turah beisei ila, chumi hunah chuan Expert Member ten min hmuh dan chiang takin a lang turah ngai ila, a tawp naah chuan Gustavo India rapporteur in thlahna thusawi a a sawi - India ramin naupangte dikna leh chanvo humhim tura a tihtur pawimawh pathum chu “Bawhzui-a, ataka thawh” (Implementation, Implementation, Implementation) hi Mizorama naupang te dikna chanvo humhim tur pawh hian kan mamawh ber niin ka hria.